તલવારનો વારસદાર

ભેટે ઝૂલે છે તલવાર
વીરાજી કેરી ભેટે ઝૂલે રે
ભીંતે ઝૂલે છે તલવાર
બાપુજી કેરી ભીંતે ઝૂલે છે

મારા બાપુને બહેન બે બે કુંવરિયા
બે વચ્ચે પાડ્યા છે ભાગ
હાં રે બેની બે વચ્ચે પાડ્યા છે ભાગ
વીરાજી કેરી ભેટે ઝૂલે રે

મોટે માગી છે મો'લ મ્હેલાતો વાડિયો
નાને માગી છે તલવાર 
વીરાજી કેરી ભેટે ઝૂલે રે 

મોટો મહાલે છે મો'લ મેડીની સાયબી
નાનો ખેલે છે શિકાર વીરાજી કેરી ભેટે ઝૂલે રે 

મોટો ચડિયો છે કંઈ હાથી અંબાડિયે
નાનેરો ઘોડે અસવાર
 વીરાજી કેરી ભેટે ઝૂલે રે 

મોટો કઢે છે રોજ કાવા કસૂંબલા
નાનેરો ઘૂમે ઘમસાણ 
વીરાજી કેરી ભેટે ઝૂલે રે 

મોટો પોઢે છે લાલ રંગીલે ઢોલિયે
નાનો ડુંગરડાની ધાર 
વીરાજી કેરી ભેટે ઝૂલે રે 

મોટો મઢાવે વેઢ વીંટી ને હારલાં
નાનો સજાવે તલવાર
 વીરાજી કેરી ભેટે ઝૂલે રે 

મોટાને સોહે હીર-જરિયાની આંગડી
નાનાને ગેંડાની ઢાલ 
વીરાજી કેરી ભેટે ઝૂલે રે 

મોટો સંતાય સુણી શત્રુના રીડિયા
નાનેરો દ્યે છે પડકાર 
વીરાજી કેરી ભેટે ઝૂલે રે 

મોટો ભાગ્યો છે સેન શત્રુનાં ભાળતાં
નાનેરો ઝીંકે છે ઘાવ 
વીરાજી કેરી ભેટે ઝૂલે રે 

મોટો જીવ્યો છે પાય શત્રુના પૂજતો
નાનેરો સૂતો સંગ્રામ
વીરાજી કેરી ભેટે ઝૂલે રે 

મોટે રે માડી તારી કુખો લજાવી
નાને ઉજાળ્યા અવતાર
વીરાજી કેરી ભેટે ઝૂલે રે 

મોટાના મોત ચાર ડાઘુએ
જાણિયાં નાનાની ખાંભી પૂજાય 
વીરાજી કેરી ભેટે ઝૂલે રે 

ભેટે ઝૂલે છે તલવાર વીરાજી કેરી ભેટે ઝૂલે રે ભીંતે ઝૂલે છે તલવાર બાપુજી કેરી ભીંતે ઝૂલે છે

-ઝવેરચંદ મેઘાણી